झापामा २६ बर्षीय महिलाले चुम्लायाहा बच्चा जन्माय

भिडियो हेर्न यहाँ क्लिक गर्नु होला

विराटनगर, भाद्र २१ - झापाको धुलाबारी-२ की २६ वर्षीया दीपा भट्टराईले चम्ल्याहा जन्माएकी छिन् । यहाँस्थित नोबेल मेडिकल कलेजमा शल्यक्रिया गरी बिहीबार दिउँसो २:३७ बजेदेखि ३ बजेसम्म उनले ३ छोरा र १ छोरीजन्माएकी हुन् ।
२८ हप्तामा जन्मिएका शिशुको तौल छोरीको ८ सय ग्राम, दुईको १ किलो २ सय ग्राम र एउटाको १ किलो छ । शिशुहरूलाई श्वासप्रश्वासमा अक्सिजन सेचुरेसनको कमी देखिएपछि अतिसघन उपचार कक्षमा राखिएको छ । 'अढाई महिनामै ४ वटा छन् भन्ने थाहा भएको थियो,' दीपाले भनिन् । निकै पीडा भएपछि उनलाई धरानस्थित बीपी प्रतिष्ठान लगिएकोमा त्यहाँ भर्ना लिन नमानेपछि विराटनगर ल्याएको दीपाका श्रीमान् घनश्यामले बताए ।
उनले भने, 'त्यहाँ बिरामीका लागि बेड थिएन । यस्तो अवस्थामा भुइँमा राखेर कसरी उपचार चलाउनु भनेर विराटनगर ल्याइयो ।' घनश्याम छिमेक लघुवित्त विकास बैंकका शाखा प्रबन्धक हुन् । दीपा त्यहाँको सूर्योदय बोर्डिङमा पढाउँथिन् ।
सिन्धुलीमाढीमा उनी कार्यरत रहँदा उनी गर्भवती भएकी हुन् । विवाहको तीन वर्षपछि चम्ल्याहा जन्मिएका हुन् । यसअघि पहिलो सन्तान दुई महिनामै खेर गएको थियो । 'त्यसपछि गर्भ अडिएन । हामीले काठमाडौंमा डा. भोला रिजाललाई देखाएका थियौं । उनले दिएको औषधि चलाएको हो,' घनश्यामले भने, 'उनलाई असजिलो होला भनेर मैले धुलाबारी घरमा ल्याएँ । मेरो जागिर पनि पायक पर्नेगरी इलाम सरुवा मिलाएको छु ।'
गत वैशाखदेखि झापास्थित घरमा रहेकी दीपाले गर्भको जाँच ओम मेची हस्पिटलमा गराउँदै आएकी थिइन् । त्यहाँका चिकित्सकले गर्भका शिशुको संख्याका बारेमा नबताए पनि भट्टराई दम्पतीले रेडियोलोजिस्ट मार्फत पत्तो पाएका थिए । दीपा भन्छिन्, 'चार जना छन् भन्ने थाहा पाउनेबित्तिकैदेखि हामी दुवैजना अलि गम्भीर भएका हौं ।' शल्यक्रियापछि जन्मिएका शिशुहरूको अति कम तौलका कारण चिकित्सकहरूले विशेष निगरानीमा राखेका छन् । डा. शान्ति सुवेदीका अनुसार आमाको स्वास्थ्य राम्रो भए पनि शिशुहरूलाई केही समय विशेष निगरानीमा राख्नुपर्ने अवस्था छ ।

भिडियो हेर्न यहाँ क्लिक गर्नु होला