 |
१६ असोज, काठमाडौं । मंसिरमा हुने संविधानसभाको उम्मेद्वारमा पार्टीले छनौट नगरेपछि नेकपा (एमाले) का बैकल्पिक केन्द्रीय सदस्य राजेन्द्र राईले घर व्यवहार छाडेर अन्ध राजनीतिमा लाग्दा व्यर्थैमा आफ्नो समय वर्वाद भएको बताउनु भएको छ । एमालेले भोजपुर क्षेत्र नम्बर १ का लागि आफूभन्दा कम्जोर राजनीतिक पृष्ठभूमिका कृपाशुर शेर्पालाई टिकट दिएपछि राईले एमालेमा त्यागी र इमान्दार भन्दा पैसाले नेता किन्न सक्नेमात्र योग्न हुने पाठ आफूले सिकेको बताउनु भएको हो ।
फेसबुकमार्फत विज्ञप्ति निकालेर राईले भन्नुभएको छ, “एमालेमा इतिहास, त्याग, बलिदान, दुःख, कष्ट, योग्यता, इमान, आचरणले कुनै मतलव राख्दो रहेनछ । घर, व्यवहार छाडेर अन्ध राजनीति गर्नु मूर्खता हो भन्ने मूल्यवान शिक्षा म लगायत धेरैलाई हाम्रा नेताहरुले दिनुभएको छ ।” आफ्नो र भोजपुर क्षेत्र नम्बर १ बाट टिकट पाएका कृपाशुर शेर्पाको राजनीतिक पृष्ठभूमिको तुलना गर्दै अनेरास्ववियूका पूर्व केन्द्रीय अध्यक्षसमेत रहेका राईले २०४१ सालबाट अनेरास्ववियूबाट राजनीति शुरु गरेको आफूलाई २०५६ सालमा एमालेमा प्रवेश गरेका कृपाशुर शेर्पा भन्दा अयोग्य ठहर गरेर पार्टीले आफूजस्ता हजारौं इमान्दार कार्यकर्ताको अपमान गरेकोमा रोष प्रकट गर्नु भएको हो ।
“मेरा लागि सम्पत्ति प्यारो होइन, अहिले पनि म विद्यार्थीजस्तै जीवन बिताइरहेको छु । कृपाशुर शेर्पाले पार्टीका नेताहरुलाई राम्रै आर्थिक सहयोग प्रदान गर्नुभएको छ ।त्यो अर्थमा पनि म एमालेका नेताहरुका लागि उम्मेद्वारमा योग्य भइन ।” राईले भन्नुभएको छ, “म सँगै राजनीति गरिहेका साथीहरु तीन पटकसम्म सांसदमा उठिसकेका छन् तर पैसाको मात्र कदर गर्ने पार्टी नेताहरुका लागि हामीजस्ता इमान्दार केही पनि रहेनछौं ।”
|
|
No comments:
Post a Comment
के छ तँपाईको प्रतिक्रिया याहाँ दिनुहोला ताजा ताजा समाचार मुजिक भिडियो हेर्न तथा विभिन्न जानकारीमुलक गधीबिधिहरु हेर्न रामेछाप सैलुङस्वोरी भिजिट गर्नुहोला