भारतले नेपाल प्रहरीलाई अत्याधुनिक एकेडेमी बनाइदिने

भिडियो हेर्न यहाँ क्लिक गर्नु होला

काठमाडौ, जेष्ठ १९ - भारतले नेपाल प्रहरीलाई अत्याधुनिक एकेडेमी बनाइदिने प्रतिबद्धता कर्मचारीको करकट्टामा सानो सहमति नहुँदा लामो समयदेखि त्यत्तिकै थन्केको रहेछ । भारतको भनाइ थियो, एकेडेमीका लागि भनेर खटिएर आउने भारतीय कर्मचारीको पारिश्रमिकमा करकट्टी गर्न पाइँदैन । नेपालले भने त्यसरी निर्माण कर्मचारीलाई समेत कूटनीतिक हैसियतमा करमुक्ति दिन नसकिने भन्दै आएको हो ।
राजधानीमा शनिबार सुरु नेपाल-भारत गृह सचिवस्तरीय वार्तामा भारतले यो माग छाड्ने सहमति जनाएपछि एकेडेमी निर्माणको एजेन्डा फत्ते भएको छ । 'हामीलाई यत्ति कुराले पनि झिँजो भइरहेको थियो, कामै रोकिएर,' बैठकमा संलग्न एक अधिकारीले भने, 'तर भारतीय गृह-सचिवले एकै भनाइमा हाम्रो कुरा माने ।'
भारतीय गृह-सचिव आरके सिंको नेतृत्वमा आएको १८ सदस्यीय वार्ता टोली र त्यत्तिकै संख्याको नेपाली टोलीबीच शनिबारै मात्र वार्ता गर्ने कार्यक्रम तय भएको हो । निर्धारित भ्रमणका बाँकी दुई दिन भारतीय प्रमण्डल पोखरा रिटि्रटमा जाँदै छ । शनिबार साँझै वार्ता सकिए पनि मस्यौदा गर्ने कामले गति नलिएपछि राति अबेर मात्र टुंगिने छाँट देखिएको थियो ।
वार्ताको उपलब्धि नै भन्न मिल्ने गरी दुइटा सहमति भए । नेपालको आग्रहमा भारत पश्चिम नेपालको शारदा ब्यारेजको पुल दैनिक सात घन्टा खुला राख्न सहमत भएको छ । यसैगरी दुई देशबीच सीमास्तम्भ नियमित पार्न तीन वर्षअघि भंग भएको प्राविधिक टोली फेरि बनाउन प्रयास गरिने भएको छ ।
नेपालका तर्फबाट वार्ता टोलीको नेतृत्व गृह सचिव नवीन घिमिरेले गरेका छन् । वार्तामा नियमित एजेन्डामै बढी छलफल भए । नेपाली पक्षले मेडिकल ड्रगको तस्करी रोक्न भारतको सहयोग माग्यो भने भारतले नक्कली नोट र गाँजा रोक्न भन्यो ।
नेपाली पक्षले सीमा क्षेत्रमा नेपाली कामदारहरूले भारतीय सुरक्षाकर्मीहरूबाट पाउने सास्ती हटाउन पर्याप्त पहल नभएको गुनासो गरेको थियो ।
यसैगरी आतंकवादीहरूले नेपाली भूमिलाई प्रयोग गर्न सक्ने कुरा उठाउँदा नेपाली पक्षले त्यो रोक्न क्षमतावृद्धिमा सहयोग गर्नुपर्ने कुरा उठाएको थियो । सीमाक्षेत्रमा बढ्दो मदरसाहरूको संख्याका सम्बन्धमा पनि भारतीय पक्षले चासो राख्यो । नेपालीमा भूराजनीतिक प्रभावको विषयमा भारतीय पक्षले चासो राख्ने अनुमान गरिएकामा त्यस्तो 'तर चीनको च पनि उठेन,' एक अधिकारीले भने ।
सोल्टी होटलमा भएको वार्ता दौरान नै भारतीय गृह सचिव सिंले सिंहदरबार गई गृह तथा परराष्ट्रमन्त्री माधव घिमिरेलाई भेटेका थिए

भिडियो हेर्न यहाँ क्लिक गर्नु होला