अन्तर्राष्ट्रिय फुटबलमा हार बेहोर्दै आएको नेपाल उपाधिमै केन्द्रित

भिडियो हेर्न यहाँ क्लिक गर्नु होला

काठमाडौ, श्रावण ५ - अन्तर्राष्ट्रिय फुटबलमा हार नियमित बेहोर्दै आएको नेपालले दोस्रो साफ यू-१६ च्याम्पियनसिप जित्ने प्रशिक्षक बालगोपाल महर्जनले बताएका छन् । दक्षिण एसियाली आठमध्ये सात देश सहभागी प्रतियोगितामा उपाधि जित्ने दाबी गर्ने उनी एक्लो हुन् । ६ पाहुना टोलीले भने स्तर सुधार गर्ने लक्ष्य बनाएका छन् ।
'व्यक्तिगत र टिम सेटका रूपमा सबै खेलाडी राम्रा छन् । त्यसैले उपाधि जित्ने लक्ष्य छ,' महर्जनले भने । विगतको तुलनामा टेक्निक, ट्याक्टिस र शारीरिक रूपमा अहिलेको टिम उत्कृष्ट भएको उनले बताए । उनको टिमले भुटानविरुद्धको खेलसँगै शनिबार समूह 'ए' को यात्रा सुरु गर्नेछ । नेपालले अफगानिस्तानविरुद्ध सोमबार र डिफेन्डिङ च्याम्पियन पाकिस्तानविरुद्ध बुधबार खेल्नेछ । भुटान र अफगानिस्तान साफ यू-१६ मा नयाँ टिम हुन् ।
'भुटानविरुद्ध खासै चिन्ता लिनुपर्ने छैन । तर, बढी आत्मविश्वासी हँुदैनौं,' महर्जनले भने । डेढ-दुई वर्षयता एन्फा एकेडेमीमा रहेका १६ खेलाडी नेपाली टिममा छन् । बाँकी ७ खेलाडी ३ महिनाअघि भएको प्रतिभा छनोटबाट लिइएको हो । एकेडेमीमा रहेका खेलाडीले इरानमा यू-१३, काठमाडौंमा यू-१४ फेस्टिभल र जापानमा किजुना बोन्ड प्रोजेक्ट -दक्षिण एसियाका ८ र जापानका २ टिम सहभागी) खेलेका थिए । ती अनुभव साफमा काम लाग्ने प्रशिक्षकको विश्वास छ ।
'यू-१४ फेस्टिभल र जापानमा गरेको प्रदर्शन तथा अभ्यासका आधारमा अहिलेको टिममा राम्रो सम्भावना देखेको छु,' महर्जनले भने । अन्तर्राष्ट्रिय प्रतियोगितामा गोल गर्न नसक्ने नेपालको कमजोरी साफ यू-१६ मा हटाउने उनले बताए । 'सिनियर टिमसँगको मैत्रीपूर्ण खेलमा निरन्तर गोल गरे । त्यसैले गोलको समस्या अभाव नहोला,' उनले भने ।
यू-१६ ले अढाई महिने तयारीमा जावलाखेल, संकटा, सरस्वती, एपीएफ, थ्री-स्टार, नेपाल यू-२३ र सिनियर टिमसँग १० खेल खेलेको थियो । उसले एपीएफ, सरस्वती र जावलाखेललाई हरायो । चार खेल बराबरीमा टुंगिए । बंगलादेशविरुद्ध २०६९ असोजमा सिनियर राष्ट्रिय टिमबाट खेलिसकेका फरवार्ड विमल घर्तीमगर, अञ्जन विष्ट, मिडफिल्डर हेमन्त थापामगर -कप्तान) अनिल राई र डिफेन्डर अनन्त तामाङ मुख्य खेलाडी हुन् ।
विमल, हेमन्त, अनिल र अनन्तले सिनियर राष्ट्रिय टिमसँगै ३ साता अभ्यास गरेका छन् । त्यसैले आफ्नो टिममा साफ यू-१६ च्याम्पियन बन्ने क्षमता भएको महर्जनले बताए । असोज ९-१३ मा काठमाडौंमा हुने एएफसी यू-१६ च्याम्पियनसिप छनोटको तयारी पनि हो, साफ यू-१६ । त्यसमा नेपालले बलिया प्रतिद्वन्द्वीहरू इराक, बहराइन र तुर्कमेनिस्तानविरुद्ध खेल्नुपर्नेछ । त्यसैले साफ यू-१६ नेपालको क्षमता नाप्ने अवसर हुनेछ । 'साफ यू-१६ जित्दै एएफसी छनोटमा टिमलाई  आत्मविश्वासी बन्न चाहन्छौं । र, साफ च्याम्पियनसिपमा सिनियर टिमलाई हौसला दिन चाहन्छौं,' महर्जनले भने ।
भीम थापा, थोमस फ्लाथ, विराटकृष्ण श्रेष्ठ र कृष्ण थापा राष्ट्रिय टिमको प्रशिक्षक छँदा सहायक भूमिकामा रहेका महर्जन अफगानिस्तान र भारतलाई बलिया प्रतिद्वन्द्वी मान्छन् । काठमाडौंमै आयोजित पहिलो संस्करणमा मुख्य प्रशिक्षक रहेका सुनील श्रेष्ठ र मृगेन्द्र मिश्र महर्जनका सहायक छन् । श्रेष्ठले सम्हालेको नेपाल यू-१६ दुई वर्षअघि तेस्रो भयो । सेमिफाइनलमा भारतसँग टाइब्रेकरमा ४-२ ले हारेपछि नेपालले तेस्रो स्थानका निम्ति भएको खेलमा बंगलादेशलाई २-१ ले पन्छाएको थियो । पाकिस्तान, भारत, अफगानिस्तान, बंगलादेश, श्रीलंका र भुटानले भने प्रतियोगिताबाट फुटबल स्तर सुधारको आस गरेका छन् ।
होटलको स्तर भएन’
काठमाडौं- बंगलादेशका डच प्रशिक्षक रेने कोस्टरले साफ यू-१६ च्याम्पियनसिपमा उपलब्ध गराएको होटल राम्रो नभएको बताए । उनले शुक्रबार पत्रकार सम्मेलनमा भने, 'व्यवस्थापन राम्रो छैन । सुविधा भएन । होटल राम्रो भएन । बिरामी भएर एक खेलाडी अस्पताल नै लानुपर्‍यो । राम्रो सुविधा पाए राम्रो हुनेछ ।'नक्सालस्थित क्राउन प्लाजामा बसेको बंगलादेशले मात्र होइन, स्वयम्भूस्थित पिस जोनमा रहेको श्रीलंकाले पनि व्यवस्थापनको आलोचना गर्‍यो । श्रीलंकाली म्यानेजर समन कोटेजले भने, 'हामी प्रतियोगितामा खेल्न मानसिक रूपमा तयार छैनौं । राष्ट्रिय टिमका निम्ति यस्तो बसाइ सुविधा अपेक्षा गरेका थिएनौं । हामी दक्षिण एसियाली हौं । पाँचतारे होटलको सुविधा मागेका छैनौं । आधारभूत सुविधा त दिनुपर्‍यो नि ।' एकै कोठामा ५ खेलाडी बस्नुपरेको र ५ खेलाडीले एउटै बाथरुम प्रयोग गर्नुपर्ने बाध्यता भएको कोटेजले बताए । प्रतियोगितामा अतिथि सत्कारका संयोजक रमेश रायमाझीले भने व्यवस्थापन राम्रो भएको दाबी गरे । 'एक कोठमा ३ जनासम्म खेलाडी राखेका छौं,' एन्फाका केन्द्रीय सदस्यसमेत रहेका उनले भने, 'बंगलादेशी खेलाडी ट्याङ खाएपछि बिरामी भएका हुन् । होटलको स्तर पहिले के थियो ? थाहा छैन । अहिले हाम्रा खेलाडी बस्न सक्ने स्तरका छन् ।' निरीक्षण गरेपछि कमजोरी भेटिए होटल परिवर्तन गर्नसक्ने रायमाझीले बताए ।

भिडियो हेर्न यहाँ क्लिक गर्नु होला